Dipersiapkan dalam Bahasa Daerah Nias
Oleh Pdt. Sudiaro Laiya
Tema :
PANGGILAN UNTUK BERTOBAT
KKR HUT di Jemaat
BNKP Tanjung Basung (hari ke I)
Senin, 8 Oktober 2007
Sub Tema (I)
Ogorofi Gamuata Sogoro Ndra’o
Fama’ele’o 2 : 1-6
1 Ba mala’ika mbanua andrõ, ba nefeso,
ba da’õ sura : Da’õ niwa’õ zolohe tangania kambõlõ dõfi andrõ si fitu, sowaõwaõ
ba gotalua naha wandru ana’a andrõ, si fitu : 2 No u’ila mbuabuau andrõ, ba fa’erege dõdõu, ba fa’anau gõlõu,
awõ wa tebai õtaha zi lõ sõkhi; ba no õtandraigõ zanguma’õ sinenge ira, ba
tenga sa ya’ia, ba no õsõndra wa sofaya ira; 3 ba no õtaha dõdõu ba no õtaõgõ
wamakao, bõrõ dõigu andrõ, ba lõ satage ndra’ugõ.
4 Ba da’õ zi fatuwu khõgu, ba khomo
andro, wa no oboholi wa’omasiu ba mborota andro. 5 Andrõ tõrõtõrõ tõdõu hadia
zi fahole khõu, ba falalini gere’erau, ba alui mbuabua ba mbõrõta andrõ;
ba na lõ õ’o’õ da’õ, ba mõido khõu, ba utuli’õ naha wandru andrõ khõu, ba
nahania, na lõ õfalalini gera’erau. 6 Ba da’õ zi so khõu; õ’ogorofi
wolau nikola’iti andro, ni’ogorofigu gõi.
Angeronua
Ba mboro huhuo
andre, itandrosaigo ba mala’ika mbanua andro, ba Nefeso, ba da’o sura (ay 1a).
Mala’ika mbanua, eluahania “ira enoni Yesu” si no mufataro ba Nefeso.
Ya’ira sa’ae zama’ema ba mbanua Niha Keriso daromali andre, si no ifa’ele’o
Yesu kho Yohane. Ohito dodo ba mboro huhuo andre, ena’o “La’ogorofi
Gamuata Sogoro Lowalangi” dozi si no banua Zo’aya. Soguna tatongoni ba
da’e :
(1) I’ila mano
fefu gamuata mbanua-Nia Yesu (ay 1-2a).
No ba danga-Nia kambolo so mbanua niha Keriso fefu (baso ay 1a).
Eluahania, baro kuasonia, baro wamatoronia so ita. Mowaowao Ia ba gotalua naha
wandru ana’a andro si fitu.
Eluahania, ba gotalua mbanua-Nia (=si
7 jemaat ba Asia Kecil) so Ia, Idorodoroi ira. Andro wa oi I’ila
gangosisila wa’aurida. Lo si tobini khonia. Andro barani Yesu wanguma’o ba
mbanua Niha Keriso ba Nefeso : “No U’ila mbuabuau andro ….” (ay 2a). He
wa’ae lo ta’ila horoda Yesu, ba so Ia ba gotaluada, faofao Ia khoda bongi
ma’okho (Mat 28:20). Tebai talimo Ia ba ngawalo gamuatada sero ma’okho. He na
tobini ba nawoda niha ba lo tobini kho-Nia (baso 1Samueli 16:7b).
(2) Isuno
mbuabua si sokhi ni’ila-Nia ba zamati (ay 2-3,6). Ni’ila-Nia ba Nefeso,
so khora wa’anau golo ba wamati he wa’ae erege dodora. Tebai lataha zi lo
sokhi, eluahania na so zolau si lo sokhi ba gotalua mbanua niha Keriso,
i’anema’o lafabali khora (melalui siasat gereja), ena’o terorogo wamati mbanua
niha Keriso sato’ ba ena’o goi terorogo wamahao satulo. Nisuno-Nia na khora,
ya’ia me lo mano latema’o ba lo lafonaha khora zamahao ba sama’ele’o sofaya.
Hadia so goi zi
nangea isuno buabuada Yesu ba ginoto andre? Tatu lo isuno na so zaleuleu
famati, na awuwu ba faroi ba wamati na so zafokho fanõrõ. Lo omuso dodo Yesu na
tesondra ba gotalua niha Keriso ni’efa’o boro wolau amuata sogoro Lowalangi. Lo
isuno mbuabua niha Keriso na hulo mano mbulu gae hili, nifangõrõngõrõ ba nangi,
ba ngawalo wamahao si no oya ngawalo. Moguna ta’ogorofi gamuata sogoro
Lowalangi ba wa’aurida sero ma’okho.
(3) Ikata’o ba
Ifangelama ba gamuata sogoro Ia, ena’o so wamalalini era’era (ay 4-5). õsi nisuno Yesu
amuata niha Keriso ba Nefeso, si no itoro li moroi yawa, ya’ia me larorogo
sibai wamahao sindruhu (kemurnian ajaran). Ba na ha ndrege da’o, lo ibono. So
zi fatuwu kho Yesu ba gamuatara. No laboholi wa’omasi ba mborota andro. Fa’omasi
kho Yesu ba fa’omasi ba nawo. Ha ba mbalo zi fofona la’omasi’o sibai Yesu si no
mangomasi’o ya’ira, itugu ara ba itugu alõ wangomasi’ora Ya’ia, ba afuriata
laboholi wa’omasi andro. Irasoi da’õ Yesu, wa fefu ngawalo nifaluara andro,
tenga sodanedane ba wangomasi’ora Ya’ia. Simano goi wangomasiora awo, itugu ara
ba itugu alo wa’omasi ba gotalua zamati.
Hewisa goi
wangomasi’oda Yesu si no mangomasi’o ya’ita. Oi sa aboto ba dododa, wa no ebua
wa’omasi Yesu khoda, no ibelego noso-Nia wangomasi’o ya’ita (Yoh 15:13). Ba na
tahaogo wamareso hewisa wangomasi’oda Yesu, ba oroma khoda wa no ogafugafu
wangomasi’oda Ya’ia. Simano goi wangomasi’o awo, i’otarai moroi yomo ba zi
sambua fongambato. Dumaduma wa’omasi ba gotalua wongambato niha Keriso, ha ba
ginoto me awena tefasindro wongambato, ba da’o oroma abõlõ wangomasi’ora awora.
Na no sa’ae mondrofi, ba ihotoi ara ba ihotoi alõ wa’omasi andro, tenga sa’ae
simane fa’omasi ba mbõrõta mege. Fa’omasi andro moguna sibai, i’otarai ba guli
dano andre ba irugi dania ba mbanua zorugo. So tolu ngawalo zi lo tebulo niwa’o
Waulo : famati, fanotona, ba fa’omasi. Sebuara ya’ia wa’omasi (1Kor 13:13). Na
no taboholi wa’omasi sindruhu andro, ifangelama ita Yesu : “Andro torotoro
todou, hadia zi fahole khou, ba falalini gera’erau, ba alui mbuabua ba mborota
andro; ba na lo õ’o’õ da’o, ba moido khou, ba utuli’o naha wandru andro khou, ba nahania, na
lo ofalalini gera’erau” (ay 5).
Niha somasi
mamalalini era’era, i’ogorofi gamuata sogoro Lowalangi. Banua niha Keriso ba
nefeso, lo tola lo la’ogorofi gamuata ba famahao Nikola’iti andro ni’ogorofi
Lowalangi (ayati 6, 15). Famahao Nikolaiti, merupakan aliran gnostik liberal.
Lasia’aigo wangehao/famoni niha bakha (kesucian batin) moroi ba wangehao
boto tano. Na no tehaogo niha bakha, ba he ifazokhi horo boto tano ba lo
hanania, molo’o famahao Nikola’iti andro. Si tekiko sa’ato mboto tano, ba boto
eheha (niha bakha) lo tebulo tana kho Lowalangi. Eluahania, aoha mano ba dodo niha wamazokhi
horo. Da’e famahao selungu, ni’ogorofi Lowalangi, ba si lo tola lo ta’ogorofi
goi ya’ita samati. He wa’ae lo nitemada famahao Nikola’iti, ba hiza ba ginoto
andre, oya niha Keriso sangaohasi ba dõdõ horõ : ba gamuata, ba wehede,
ba ba wariawosa. Boro da’o, moguna mangelama ita. Niha keriso si no amaedola
ndrofi ba fandru si tebai tobini, si tobali dumaduma, solohe niha ba haga
Keriso . Da ta,ogorofi gamuata sogoro Yesu. Yaduhu !
KKR HUT di Jemaat BNKP Tanjung Basung (hari
II)
Rabu, 10 Oktober 2007
Sub Tema (II)
Boi Aroro ba Wangomusoi’o Todo Osi Guli Dano
Lukas 16 : 19-31
19 Ba so mefona niha so’ana’a, sobaru
baru luo manõ ba muko si sokhi sibai, ero ma’okho i’omusoi’o manõ dodonia, lo
ambo’ambo hadia’ia. 20 Ba so goi zi numana, Lazaro doi, nitou’o baro mbatonia,
oi gigimo. 21 Ba omasi da’o ihalo onia zi lo a’oi ba wemanga zo’ana’a andro. Ba
so goi nasu, lafelafelai gigimonia andro.
22 Ba samuza ma’okho, ba mate zi
numana andro, ba la’ohe ia ba gaheta Gaberahamo mala’ika. Ba mate goi
zo’ana’a no mege, ba lako’o. 23 Ba ba mbanua tou, ba ifaoga horonia, me no
i’ila wa’afokho, ba i’ila Gaberahamo, ba zarou, awo Lazaro no mege, ba
gahetania. 24 Ba mu’ao ia imane : He Tuagu, Aberahamo! hakhõsi todo ndra’o, ba
fatenge Lazaro andro, ena’o i’ungugo zara nuwu durunia ba nidano, ba i’okafui
lelagu, me no afokho khogu ba holahola galito andre. 25 Ba imane Aberahamo : He
onogu, torotoro todou, wa no otema zi sokhi andro, tana khou, goto we’asomo ba
guli dano, ba si mano goi wa no itema zi lo sokhi andro Lazaro; ba iada’e ba
terara dodonia ba da’e, ba khou, ba fa’afokho. 26 Ba baero o fefu, ba no
mu’a’aro’o gohokoho sebua ba gotaluada, ena’o tebai latoro sedona moi ba khomi,
soroi da’e, ba tebai goi zi otarai moroi sa khomi, si moi ba da’e ena’o.
27 Ba imane : Ba u’andro khou Tua,
ena’o ofatenge ia ba nomo namagu, so nasa dalifusogu, dalima, ena’o ifaduhu’o
khora, fa boi moi ira goi ba naha wa’afokho andre. 29 Ba imane Aberahamo : So
khora zura Moze ba sura zama’ele’o andro; ndramufondrondrongo da’o. 30 Ba imane
: Ai lo’o Tuagu Aberahamo, ha na moi khora zi’otarai zi no mate, awena
lafalalini gera’erara. 31 Ba imane khonia : Na lo lafondrondrongo li Moze, awo
li zama’ele’o, ba lo’o goi mamati ira, na so zi maoso moroi ba ngai zi mate.
Angeronua
Boro huhuo andre,
amaedola Yesu niha so’ana’a ba Lazaro si numana. So’ana’a andre, ero ma’okho
i’omusi’o dodonia, me lo sambo khonia hadia’ia, ba wa’ebua gana’ania. Ma’ifu lo
itoro todonia dano bo’o, lo khonia fa’omasi nawo ba he fanolo si numana. Lo ba
dodonia Lazaro si numana, he wa’ae baro mbato nomonia so, ba lo itolo. Ogoro ia,
me oi gigimoso Lazaro, hato da’o nawonia asu, samelamelai gigimonia.
Me irugi inotonia,
mate Lazaro, ba la’ohe ia ba gahetaq Gaberahamo mala’ika, ba nahia wa’ohahau
dodo, si lo mamalomalo. Ba lo ara, ba mate goi zo’ana’a no mege, lako’o, ba ba
mbanua tou so ia, si so holahola galito, ba nahia wangarongaro si lo tebulo.
Ohito dodo ba
gamaedola Yesu andre, si tobali famangesa dododa :“Ena’o boi aroro ita ba
wangomusi’o todo osi guli dano.” Sodane-dane moroi ba da’o, moguna
tatongoni tolu ngawalo.
(1) Lo ifasao
ita ba zorugo harato guli dano (ay 19, 22b-24).No aroro mano zo’ana’a
andre ero ma’okho, ba wangomusoi’o todonia ba guli dano. Boro da’o, tatu wa lo
itotona me irugi ia fa’amate, si mane nitoro Lazaro si numana. Tobali, he si
numana ba he so’ana’a, he sebua faka ba he si lo toi, faoma mate
ba ginotonia. Ba soroma khoda ba da’e, he wa’ae ebua gana’a niha so’ana’a
andre, he wa’ae lo fa’ambo hadia’ia khonia, ba hiza lo tola ifasao ia ba zorugo
ana’ania andro. Ba fa’omuso dodo ba gana’a, ha ndrege guli dano andre, lo
tobali ia fangomuso dodo dania ba mbanua zorugo.
Boro da’o, boi aroro
mano ita wangalui ba ba wangohona harato guli dano, irege olifu ita wangalui
sabolo moguna, ya’ia wangalui banua Lowalangi ma banua zorugo (baso Mat 6:33).
Fa’omuso dodo Niha Keriso, tenga fa’omuso dodo ba guli dano. Si lo tola lo
mufalua, ya’ia wa’omuso dodo ba kho Zo’aya (baso Fil 4:4). Na saroro ita, ba lo
ta’ila mbawa awo ginoto na mangawuli Zo’aya khoda zamosana, na irugi fa’amaterda,
ba si tetibo ita, si mane so’ana’a andre. Ba nisondrada ba guli dano, lo tola
i’orifi ita, ba lo tola ifasao ita ba mbanua zorugo.
(2) Ba ginoto
fabali noso ba mboto, tehonogoi sa’ae gurakha zamosana (25-26). No
itema mege wa’ohahau dodo ba guli dano so’ana’a, ba urakhania iada’e, fa’afokho
ba narako. Ba no goi itema zi lo sokhi Lazaro me so ia ba guli dano, ba iada’e,
terara dodonia, falukha ia wa’ohahau dodo ba zorugo. Ba da’e, moguna tatongoni
fa boi fasala ita wamo’eluaha : lo fefu mano zo’ana’a ba oi ba narako nahara,
ba lo goi fefu zi numana ba oi ba zorugo nahara; mangawuli sa ba wamati
zamosana.
Soguna aboto
ba dododa ba da’e, wa si no tehonogoi urakha zamosana, lo fa’atebulo,
si’ogoto’o fa’ara. He na fangarongaro ba he goi na fa’omuso dodo. Ba gotaluara
zorugo narako, no so goto’oto, si tebai mutoro. Si so ba narako, lo tola moi
ira manoro ba zorugo. Si so ba zorugo, ba tatu wa lo omasi ira moi manoro ba
narako. Boro da’o, moguna ta’angeronusi, he numalo ita. Ba mbuku ZinunoNo.
365 ayati 3 imane : “Ha dua naha nihonago, sorugo nahia zatulo. Narako
faafokho, nahia zokho horo. Eronusi he numalo ndraugo.
(3) Fatua so
noso ba mboto, alui ba oguna’o daroma li Lowalangi, ba falua wamalalini era’era
(27-31). Moroi ba zi no tebotokhi, aboto ba dododa, wa lo sa’ae inoto
wamalalini era’era ba zi no mate, ha ba niha sauri. Famalalini era’era ba niha
sauri, ba lo goi moguna labase’o danda saholiholi dodo. Lo moguna labase’o zi
maoso moroi ba ngai zimate, we’amoi mangombakha li Lowalangi, awena mamalalini
era’era. Da’o nitotona zo’ana’a andre, me no fahona wa’abe’e dodo kho ndra
talifusonia sauri, si dalima to, ba i’andro ena’o moi Lazaro wangombakha khora,
ena’o lafalalini gera’erara. Andro iwa’o ba ayati 31, na lo lafondrondrongo
li Moze awo li zama’ele’o, ba lo’o goi mamati ira, he na so zi maoso moroi ba
ngai zi mate. Sabolo moguna molo’o niwa’onia ba ayati si 29 : So khora
zura Moze ba sura zama’ele’o andro; ndra mufondrondrongo da’o.
Eluahania, fatua so
noso ba mboto, boi so khoda wa’abe’e dodo, ta’oguna’o ginoto si so, ba
wamalalini era’era. Ta’alui, tafondrondrongo, ba ta’ogunao daroma li Lowalangi,
ba wa’aurida ero ma’okho. Ta’alui, eluahania ta’ondrasi hezo nahia ba hadia
ginoto na tefatuno daroma li Lowalangi. Tafondrondrongo ba tabe ba dododa.
Ta’alui, eluahania tabaso Zura Ni’amoni’o si no so khoda, ta’angeronusi,
tafati, tatema’o ba ta’o’o, hadia nifahao daroma li yaita.
“Mi’alu’alui ba
zura, me miwa’o so khomi ba da’o wa’auri si lo aetu; ba ya’ia zamaduhu’o ya’o.”
(Yoh 5:39). “Ya’ahowu zamondrongo taroma li Lowalangi ba same’e ba dodo.”
(Luk 11:28). Ba ba zura Wama’ele’o 1:3 imane : “Ya’ahowu zombaso
taroma li fama’ele’o andro, ba samondrongo ya’ia, ba solo’o
nisura andro ba da’o, noa sa ahato ginotonia andro.” Ba zura Heberai’o 4:7b
: “Ma’okho andre, na mirongo linia, ba boi mi’abe’e’o dodomi.” Yaduhu!
KKR HUT di Jemaat
BNKP Tanjung Basung (hari III)
Jumat, 12 Oktober
2007
Sub Tema (III)
Falukha Wa’ohahau Dodo Niha Si No Mu’efa’o Horo
Sinuno 32 : 1-11
1 Ya’ahowu niha ni’efa’o olalowa
andro, nibalugo horõ. 2 Ya’ahowu niha ba zi lo ibe’e horõ lalõ andro Yehowa ba
si lo falimosa ba dodo. 3 Me lo u’ombakha’o, ba ariri dolagu, ba wangarõngarõgu
andro, si lo mamalomalo. 4 Bongi ma’okho sa tohare khogu dangau, otufo nidano
nosigu, mane na bawa lokho. 5 Ba u’ombakhao khou horogu, ba lo ubini’o lalogu
andro. Umane : “Da’u’ombakha’o kho Yehowa golalowagu andro.” Ba awena o’efa’o
khogu horogu, lalogu andro.
6 Andro ya mangandro khou dozi
satulo, na bawa o’oroma’o ndra’ugo; he wa’ae anõnõ dano molõ sebua, ba lo
ikhamo ira. 7 Ba’aba’a ndra’ugo khogu, otimba khogu wamakao; ofasui ndra’o
fa’iki ba wangorifi.
8 Ufahao ndra’ugo, ufobawa lala khou,
nitorou, ufolala dodou, wangõhõndrõgõ ya’ugo. 9 Boi mifaomago ami ba kudo ba ba
kudo kalide, si lo todo; sinali ba si’oli ba mbawa, fakakera, wamatoro; na lo
da’o ba lo moi khou. 10 Oya ngawalo wamakao ba zebua horo, ba sanotona khou,
Yehowa, ba ifasui fa’ebua dodo. 11 Mi’omusoi’o dodomi kho Yehowa ba
mi’owuawua’o dodomi, ya’ami satulo todo, ba mi’a’iki dozi sadolo todo.
Angeronua
Horõ, oya ifobõrõ
wa’abu dodo ba niha. Oya mano ngawalo wamakao ba fangarongaro. Boro horo lo
falukha wa’ohahau dodo ba niha. Lualua horo, ba fa’amate si lo aetu. Ba mboro
huhuo andre, ifaduhu’o khoda, wa tola “Falukha wa’ohahau dodo niha si no
mu’efa’o horo.”
Hewisa lala ena’o
tola falukha ita wangefa horo, irege moroi ba da’o dania tola tasondra
wa’ohahau dodo? Da ta’osisi’o hadia zi lo tola lo tafalua sodanedane moroi ba
mboro huhuo andre.
(1) Ta’ombakha’o
horoda kho Lowalangi (ay 1-5,10a). Ba ayati 3-4 imane sanura sinuno
andre : “Me lo u’ombakha’o, ba ariri dolagu, ba wangarongarogu andro, si lo
mamalomalo. Bongi ma’okho sa tohare khogu dangau; otufo nidano nosigu, mane na
bawa lokho.”
Boi mano tabini’o
horoda fona Lowalangi, me oya ifoboro khoda wangarongaro, okoli nosida ba ariri
dolada ibe’e. Duhu Lowalangi andro, sebua fa’omasi. Ba boi olifu ita wa no goi
Lowalangi satulo Ia, ogoro Ia horo, ba tebai mano omasi Ia niha si lo tebulo ba
horo. Bongi ma’okho tohare khoda danga Lowalangi, ilulu ita ba wangarongaro, ba
ba wa’abu dodo soya ngawalo.
Na tazarazara
wangombakha, ba na ta’akui horoda fona Lowalangi si lo famini todo, ba tafabu’u
wa ta’ogorofi sa’ae horo, awena i’efa’o khoda horoda andro Lowalang (baso 1Yoh
1:9). Niha si no mu’efa’o horo, falukha howuhowu awo wa’ohahau dodo (ay
1-2).
(2) Boi faroi
wangandro kho Lowalangi na bawa i’oroma’o Ia (ay 6-7). Fangandro,
fangoroma gamakhaita si sokhi ba gotalua niha Lowalangi. Fangandro, no sambua
lala wariawosada kho Lowalangi.
Niha si no manema
buala fa’ebua dodo Lowalangi, fangefa horo, lo tebulo fariawo ia kho Lowalangi,
owolo’olo ba wangandro. Ba na no i’efa’o horoda Lowalang, ba na lo tebulo
fariawo ita kho-Nia ba wangandro, Irorogo wa’aurida, ba tobali ba’aba’a Ia
khoda ba zi lo sokhi. Da’e niwaonia ba ayati 6-7 : “Andro ya mangandro khou
dozi satulo, na bawa o’oroma’o ndra’ugo; he wa’ae anono dano molo sebua, ba lo
ikhamo ira. Ba’aba’a nda’ugo khogu, otimba khogu wamakao; ofasui ndra’o fa’iki
ba wangorifi.” Da’e wa’ohahau dodo si falukha ita na no tatema wangefa
horo.
(3) Taroi
wa’abe’e dodo, talulu ita nifaha’o-Nia (ay 8-11). Niha sabe’e todo, si
lo ba dodo Lowalang, hulo kudo ba kalide. Sinali ba si’oli ba mbawara, ba si
fao bozibozi wamatoro ya’ira. Na abe’e dododa, na talau mano ita ba zomasi
gera’era dododa, ba ifatoro’o khoda zafokho Lowalang, I’out’o ita. Da’e
niwa’oniua ba ayati 10a : “Oya ngawalo wamakao ba zebua horo, ….” Boro
da’o, moguna taroi gamuata fa’abe’e dodo.
Na no taroi ganuata
fa’abe’e dodo, talulu ita nifatoro-Nia, moi ita nifahao-Nia (nifahao
daromali-Nia); ba moroi ba da’o tasondra wa’atuatua. Ba taromali-Nia andro zi
tobali umbu wa’ohahau dododa. Yaduhu !
---------------
Catatan penting :
Minggu, 14 Oktober 2007
KKR HUT di Jemaat BNKP Tanjung
Basung (hari IV)
Sub
Tema
IV :
Jangan terlambat, Siap sedialah (Mat 25:1-13)
Sama dengan di Jemaat BNKP Tabing
(Lihat tgl. 23 September 2007).
Diposkan di Batam, Jumat 29 Juli 2016
oleh Pdt. Sudiaro Laiya.
Tidak ada komentar:
Posting Komentar